Exo 37 | NdeIBE | STEP | UBhezaleli wabaza ibhokisi lesivumelwano ngezigodo zesihlahla somo-akhakhiya ubude balo babuzingalo ezimbili lengxenye, ububanzi buyingalo elengxenye.

Exodus 37

Ibhokisi lesivumelwano

1 UBhezaleli wabaza ibhokisi lesivumelwano ngezigodo zesihlahla somo-akhakhiya ubude balo babuzingalo ezimbili lengxenye, ububanzi buyingalo elengxenye. 2 Walihuqa ngegolide elicengekileyo ngaphakathi langaphandle, wabuye walizingelezela ngomthando wegolide.

3 Walibumbela amasongo amane egolide wawanamathisela ezinyaweni zalo zone, kusithi amasongo amabili kwelinye icele kuthi amabili kwelinye njalo. 4 Wasebaza imijabo ngesihlahla som-akhakhiya wayihuqa ngegolide. 5 Ngakho wasehloma imijabo leyo kumasongo ayesemaceleni ebhokisi lesivumelwano ukuze lithwalwe ngayo.

6 Wenza isihlalo somusa ngegolide elicengekileyo saba yisisibekelo – ubude baso buyingalo eyodwa elengxenye. 7 Njalo wenza amakherubhi amabili ngegolide elicanduliweyo ekucineni kwesihlalo somusa emaceleni womabili.

8 Wenza ikherubhi elilodwa nganxanye kwathi kwelinye icele wawenza aba yinto yinye lesisibekelo. 9 Amakherubhi ayelulele amaphiko awo phezulu emboza isisibekelo ngawo. Amakherubhi ayekhangelene, ubuso bawo bukhangele isisibekelo.

Itafula yezinkwa

10 Babaza itafula ngezigodo zesihlahla somakhakhiya – ubude bayo babuzingalo ezimbili, ububanzi buyingalo eyodwa, ukudepha kuyingalo elengxenye. 11 Ngakho balihuqa ngegolide elicengekileyo balizingelezela ngomthando wegolide. 12 Babuya benza kunxa zonke zetafula ibhanti legolide elalingangesandla somuntu ububanzi, basebefaka umthando wegolide phezu kwebhanti. 13 Benza amasongo amane egolide bawafaka emagumbini womane enyaweni zetafula. 14 Amasongo afakwa eduze lebhanti ukuze abambe imijabo eyayisetshenziswa ukuthwalisa itafula. 15 Imijabo yokuthwalisa itafula yayenziwe ngezigodo zesihlahla somakhakhiya njalo ihuqwe ngegolide. 16 Njalo benza ngegolide elicengekileyo izitsha zetafula – imiganu, izinditshi lemiganu eyingubhe kanye lezitsha zokutshisela iminikelo enathwayo.

Uluthi lwesibane

17 Benza uluthi lwesibane ngegolide elicengekileyo, balwenza isidindi salo lomzimba walo kwaba ngumsebenzi okhandiweyo, imbizana zalo, amahlumela alo kanye lamaluba alo kwenziwa kwaba yinto yinye. 18 Izingatsha eziyisithupha zaxhunywa emaceleni oluthi lwesibane – izingatsha ezintathu nganxanye kuthi ezinye kwelinye icele. 19 Izimbizana ezintathu ezibunjwe okwamaluba e-alimondi lamahlumela kanye lamaluba kwakusegatsheni lunye, ezinye ezintathu egatsheni olulandelayo, kwaba njalo kuwo wonke ayisithupha exhunywe eluthini lwesibane. 20 Kanti-ke oluthini lwesibane kwakulembizana ezine ezibunjwe okwamaluba e-alimondi elamahlumela kanye lamaluba.

21 Ihlumela elilodwa lalingaphansi kwezingatsha ezimbili, njalo ihlumela lesithupha lingaphansi kwezinye njalo izingatsha ezimbili – zonke ingatsha ziyisithupha. 22 Amahlumela kanye lezingatsha kwakuyinto yinye loluthi lwesibane, kukhandwe ngegolide elicengekileyo.

23 Balwenzela izibane eziyisikhombisa, kanye lentambo lezimbizana ezenziwe ngegolide elicengekileyo. 24 Uluthi lwesibane kanye lakho konke okuphathelene laso kwenziwa ngegolide elicengekileyo eliyisisindo esingamakilogramu angamatshumi amathathu lane.

I-Alithare lempepha

25 Benza i-alithare lempepha ngezigodo zesihlahla som-akhakhiya. Lenziwa lalingana inxa zonke, ubude balo buyingalo eyodwa, lobubanzi buyingalo eyodwa, kanti ukudepha kuzingalo ezimbili – impondo zalo zenziwa zaba yinto yinye kanye lalo. 26 Balihuqa ngegolide elicengekileyo phezulu, emaceleni kanye lempondo zalo, njalo balengezelela ngokubumbela umthando wegolide. 27 Benza amasongo amabili kuleli icele lamanye amabili kwelinye njalo – ukubambanisa imijabo yokuthwalisa i-alithare lempepha. 28 Benza imijabo ngesihlahla som-akhakhiya bayihuqa ngegolide.

29 Benza njalo lamafutha angcwele okugcoba abakhethiweyo, lempepha elephunga elimnandi – kungumsebenzi womenzi wamakha.